Ыджыд батьӧ — ветеран

Победалы 55 во тырӧмкӧд йитӧдын ме кӧсъя гижыштны аслам ыджыд бать Дмитрий Иванович Пашнин йылысь.

Ыджыд бать чужліс 1918 вося урасьӧм 5-ӧд лунӧ. Велӧдчис 4 во (та мында обязательнӧйыс вӧлӧма). Велӧдчӧм помалӧм бӧрын ёна кыйсис. 1937-ӧд воын муніс мольбӧжӧн Котласӧ. Сэсся пуктісны десятникӧ. Оліс Сыктывкарын, уджаліс лесозаводын, сплавконтораын. Сыктывкарсянь и босьтісны армияӧ 1938-ӧд воын. Первой служитіс Житомирын артиллерийской войскаын. 1939 воын нуисны Польшаӧ. Веськавліс и финскöй война вылӧ. Сэні ранитчис. Во джын куйліс госпитальын, сэсся воліс 3 тӧлысь кежлӧ гортас. Медым служитны кольӧм сроксӧ, военкомат мӧдӧдіс Кушуба станцияӧ запаснӧй полкӧ. Сэсся служитіс Молотов карын стрелокӧн 1942 вося апрельӧдз. Апрельын босьтісны Карельскöй фронт вылӧ. Вӧлі ӧрудиеса командирӧн да старшӧй сержантӧн. Вӧрӧгӧс вӧтлісны Норвегиялӧн граница дорӧдз.

«Карелияын наступайтігӧн некутшӧм грезд эз паныдасьлы. Сӧмын вӧр да из. Шойччыны некӧн. Пу сямаӧс кӧ аддзам, сэтчӧ и водыштлам, а тӧлын — лым пиас. Артиллерийскöй ӧрудие кыскалім», — казьтылӧ ветеран.

Победа шедӧдӧм бӧрын, 1946 вося январын, локтіс гортас. Кӧть войнасянь колис нин 55 во, но сьӧлӧмказьтылӧмъяс весиг шогӧдлӧны мортсӧ.

Война колис доя пасъяс. Артиллерийскöй войскаад служитігад лои сьӧкыд пеля. Да и война кадад витаминъяс тырмытӧмысь висьмывлӧма сідз шусяна куринӧй слепотаӧн да лёка аддзӧ. Весиг операция вӧчлісны синмас.

Унатор на эськӧ позис гижны сылӧн казьтылӧмъясысь, кыдзи вердлісны, кыдзи олісны-вылісны… Ыджыд батьлӧн эмӧсь «За боевые заслуги», «За оборону Заполярья», «Отличный артиллерист» медальяс.

Ыджыд бать вель окотапырысь лыддьӧ «Парма горысь» аскоддьӧм йывсьыс, кодъяс сы моз жӧ служитісны Великӧй Отечественнӧй война вылын.

Александра Дёмина.

Скӧрӧдум.

Парма гор, 2000, Март 11 лун (29 №).